آگ کا رشتہ نکل آئے کوئی پانی کے ساتھ زندہ رہ سکتا ہوں ایسی ہی خوش امکانی کے ساتھ |Zafar Iqbal

آگ کا رشتہ نکل آئے کوئی پانی کے ساتھ

زندہ رہ سکتا ہوں ایسی ہی خوش امکانی کے ساتھ

 

تم ہی بتلاؤ کہ اس کی قدر کیا ہوگی تمہیں

جو محبت مفت میں مل جائے آسانی کے ساتھ

 

بات ہے کچھ زندہ رہ جانا بھی اپنا آج تک

لہر تھی آسودگی کی بھی پریشانی کے ساتھ

 

چل رہا ہے کام سارا خوب مل جل کر یہاں

کفر بھی چمٹا ہوا ہے جذب ایمانی کے ساتھ

 

فرق پڑتا ہے کوئی لوگوں میں رہنے سے ضرور

شہر کے آداب تھے اپنی بیابانی کے ساتھ

 

یہ وہ دنیا ہے کہ جس کا کچھ ٹھکانا ہی نہیں

ہم گزارہ کر رہے ہیں دشمن جانی کے ساتھ

 

رائیگانی سے ذرا آگے نکل آئے ہیں ہم

اس دفعہ تو کچھ گرانی بھی ہے ارزانی کے ساتھ

 

اپنی مرضی سے بھی ہم نے کام کر ڈالے ہیں کچھ

لفظ کو لڑوا دیا ہے بیشتر معنی کے ساتھ

 

فاصلوں ہی فاصلوں میں جان سے ہارا ظفرؔ

عشق تھا لاہوریے کو ایک ملتانی کے ساتھ

 

ظفر اقبال

 

aag ka rishta nikal aae koi pani ke sath

zinda rah sakta hun aisi hi KHush-imkani ke sath

tum hi batlao ki us ki qadr kya hogi tumhein

jo mohabbat muft mein mil jae aasani ke sath

baat hai kuchh zinda rah jaana bhi apna aaj tak

lahar thi aasudgi ki bhi pareshani ke sath

chal raha hai kaam sara KHub mil-jul kar yahan

kufr bhi chimTa hua hai jazb-e-imani ke sath

farq paDta hai koi logon mein rahne se zarur

shahr ke aadab the apni bayabani ke sath

ye wo duniya hai ki jis ka kuchh Thikana hi nahin

hum guzara kar rahe hain dushman-e-jaani ke sath

raegani se zara aage nikal aae hain hum

is dafa to kuchh girani bhi hai arzani ke sath

apni marzi se bhi hum ne kaam kar Dale hain kuchh

lafz ko laDwa diya hai beshtar mani ke sath

faslon hi faslon mein jaan se haara 'zafar'

ishq tha lahoriye ko ek multani ke sath